Fas lanmè

Mwen pran w nan bra m

Nou chita fas lanmè

Nan yon kout soupi

Lanati rakonte tout sa kè m te sere

Lanmou n se ti limyè isi ba

Ki janbe lizyè paradi

Limyè solèy la klere sou vag yo

Konsa souri w klere kè m

Bonè pa gen twòp filozofi

Se karès la briz

Marande ak souplès ou manyen m

Pa gen pwezi dous pase sa

Lakansyèl vin douvan pòt mwen

Si se siy delivrans

Kounyan tout ti detay fè sans

Nan pwen chans ni koensidans

Yon ti boujon flè dizè

De kou diven pou sele istwa n

Epi m tou tonbe la

San gad dèyè

Men w tounen nan bra m

Nou chita fas lanmè

---

Nathanaël Delva