Ki Lwa?

M limen balèn

Mwen lapriyè

M woule chaplè

M trase vèvè

Mwen fè sanblan

M fè move san

Nan kache tèt mwen m pèdi tan

Mwen liminen m fè defisi

Dlo je m koule pou granmesi

Ki lwa k di sa?

Ki lwa k fè sa???

M gen gwo dout sou tout sa m anvi

M gen laperèz sou sa m vle fè

Mètrès Dantò di m si m antò

Manzè Freda di m sa k fè sa

Yon bragèt gate karantèn mwen

Nan beny pou retire giyon an

G on move fèy ki fwote ak bon fèy mwen

Se pa ti dous sa dous

Pwen an genlè gate?

Ki lwa k di sa?

Ki lwa k fè sa???

Nan tout bèl rèv mwen fè

Tout sòlda mache sou menm pa

Tout men k grate pla men se men moun

Tanbou kè m bat byen fò pou tout

Tout sa m fè byen tout sa m fè bon

Nan bib moun yo

Tout sa m fè mal

Tout ti tèk bò wonn se gwo peche depi opa

Ki lwa k fwenk di sa?

Ki lwa k fout fè sa?!

3 goud kleren

7 grenn sigarèt tèt blanch

Lakansyèl bwè dlo nan fant janm vyèj mirak

Lakansyèl oooo se pa ti bèl ou bèl

Lakansyèl oooo... Hmmmm ala chay ou gen pou w pote

Tout koulè w ret anba po m

Tout koulè w nan ma drapo m

S on lwa k fè sa vre???

Papa Ogou m mande w padon

Papa Loko vin pran ason w

Kouzen Zaka ou mèt boude

Legba m te wè avan yè a

Legba k te bo m nan baryè a

Bri kouri s on gason li ye

Sa te twò bon m pat verifye

G on dènye lwa k danse nan tèt mwen

M pa konn si l ni fanm ni gason

Ti pis lakwa mèt al pale

Tonèboule m pap kite sa!

Ki lwa k di sa?

Ki lwa k fè sa?

Pou m pa renmen sa k entèdi?

S on lwa di sa?

S on lwa k fè sa?

Anverite m pap pran nan sa!

---

Georgy Lundi