Melanin

Souri w chita sou kè m danmijann,

An kalifouchon,

Mwen santi m ta bouchon w

Tandrès ou sele lespri m

Ou tache ladan l

Kon 2 nawè m tache nan pwent tete w.

Mwen fon priyè douvan maji po w, fanm

Mwen reve gran jou, chak kout ren

Ki mennen chak bout souf nou ta pataje

Chak lè koulè zye w pran marye ak lèv ou,

Yon flè dizè boujonnen

Souri w mennen bonnanj mwen nan yon flann.

Chak fwa solèy batize kò w

Nanm mwen fè tou paradi,

Bèl, pwès,

Blak Pantè,

Plen kon lalin,

Mwen rele w Melanin

Kilè w va banm moso dous, grenn siwèl…

Sant ou ta tache anba po m,

Gou w ta rete nan chak sans mwen,

Ou tap pi bèl souvni m

M a limen yon fanal pou ou,

Melanin.

---

Nathanaël Delva